“ഖേരളം”

ചോദ്യം : കേരളത്തിൽ 31 കോടീശ്വരന്മാരാണുള്ളത്, ഗുജറാത്തിൽ 110 ഉം. അങ്ങിനെയാന്നെകിൽ ഇതിൽ കൂടുതൽ സാമ്പത്തിക അഭിവൃദ്ധി പ്രാപിച്ച സംസ്ഥാനം ഏതായിരിക്കും, കൂടുതൽ ദരിദ്രർ ഉള്ള സംസ്ഥാനം ഏതായിരിക്കും?

ഒറ്റ നോട്ടത്തിൽ കൂടുതൽ സാമ്പത്തിക അഭിവൃദ്ധി പ്രാപിച്ച സംസ്ഥാനം ഗുജറാത്ത് എന്നാണ് ഉത്തരം നിങ്ങൾക്ക് മനസ്സിൽ വരുന്നതെങ്കിൽ ബാക്കി വായിക്കുക.

ഗുജറാത്തിലും കേരളത്തിലും ഏതാണ്ട് ഒരേ ശരാശരി ആളോഹരി വരുമാനമാണുള്ളത്. ഏതാണ്ട് രണ്ടു ലക്ഷത്തി നാല്പതിനായിരം രൂപ. പക്ഷെ ഇതിനർത്ഥം കേരളത്തിലും ഗുജറാത്തിലും ഉള്ള ഓരോരുത്തർക്കും ഇത്രയും രൂപ വാർഷിക വരുമാനം ഉണ്ടെന്നല്ല. പണക്കാർക്ക് പാവപെട്ടവരേക്കാൾ കൂടുതൽ വരുമാനം ഉണ്ടാകും. ഇവ എല്ലാം കൂടി കണക്കാക്കിയാണ് ശരാശരി വരുമാനം കണക്കാക്കുന്നത്. കോടിക്കണക്കിന് പാവപ്പെട്ടവർക്ക് കുറഞ്ഞ കൂലി ലഭിക്കുന്ന ഒരു സംസ്ഥാനത്തു നൂറ്റിപ്പത്ത് പേർക്ക് വളരെ അധികം സമ്പാദ്യം ഉണ്ടായാൽ അത് ശരാശരി വരുമാനത്തെ കൂടുതലായി കാണിക്കും, ഭൂരിഭാഗം ജനങ്ങളും നേടുന്നത് കുറഞ്ഞ വരുമാനം ആണെങ്കിൽ കൂടി. ഗുജറാത്തിലെ 110 കോടീശ്വരന്മാരുടെ മൊത്തം സമ്പാദ്യം ₹10,31,500 കോടി രൂപയാണ്. ഇതാണ് അവരുടെ ശരാശരി വരുമാനത്തെ കൂടുതലാക്കി കാണിക്കുന്നത്. സ്റ്റാറ്റിസ്റ്റിക്‌സ് ക്‌ളാസിൽ സ്റ്റാൻഡേർഡ് ഡീവിയേഷൻ പഠിച്ചവർക്ക് ഇത് പെട്ടെന്ന് മനസിലാകും. (സാമ്പത്തിക ശാസ്ത്രം പഠിപ്പിക്കുന്ന ക്ലാസ്സിൽ Gini ഇൻഡക്സ് അല്ലെങ്കിൽ Gini coefficient കൊണ്ടാണ് ഈ അസമത്വത്തെ അളക്കുന്നത് പക്ഷെ സമ്പത്ത് കൂടുമ്പോൾ Gini index വർധിക്കുന്നത് കൊണ്ട് ഈ താരതമ്യത്തിൽ ഇതുപയോഗിക്കാം പറ്റില്ല. )

ഇങ്ങിനെ പണം വളരെ കുറച്ചു ആളുകളുടെ കയ്യിൽ മാത്രം കുമിഞ്ഞു കൂടുന്നതുകൊണ്ടാണ് ഗുജറാത്തിലെ കൃഷിക്കാർ അല്ലാത്ത തൊഴിലാളികൾക്ക് ദിവസേന കിട്ടുന്ന വേതനം, ഇന്ത്യയിലെ ഏറ്റവും കുറഞ്ഞ കൂലികളിൽ ഒന്നായ , വെറും 234 രൂപ ആകാൻ കാരണം. കേരളത്തിൽ 670 രൂപയാണ്. കേരളം പുറത്തു നിന്ന് പ്രവാസികൾ അയക്കുന്ന പൈസ കാരണമാണ് ഇങ്ങിനെ കൂടുതൽ വേതനം കൊടുക്കുന്നത് എന്നാണ് നിങ്ങളുടെ വാദമെങ്കിൽ, നമ്മുടെ തൊട്ടടുത്ത് കിടക്കുന്ന തമിഴ്‌നാട്ടിൽ ദിവസക്കൂലി 438 രൂപയാണ്. ഗുജറാത്തിന്റെ ഇരട്ടി. . നിങ്ങൾ ഒരു കോടീശ്വരനാണെങ്കിൽ ഗുജറാത്ത് നല്ല സ്ഥലമാണ്, സാധാരണക്കാരന് ആണെങ്കിൽ കേരളവും.

ദാരിദ്ര്യ രേഖയുടെ അടിസ്ഥാനത്തിൽ ഇത് വ്യക്തമായി കാണാൻ പറ്റും. ഗുജറാത്തിലെ 19 ശതമാന ആളുകൾ മാസം 1300 രൂപ പോലും സമ്പാദിക്കാതെ ദരിദ്ര രേഖയ്ക്ക് താഴെ കിടക്കുന്ന ആളുകളാണ്, കേരളത്തിൽ ഇത് 0.7 ശതമാനവും, ഈ പോസ്റ്റിന്റെ കൂടെ കൊടുത്തിരിക്കുന്ന ചിത്രം കാണുക. ( നീതി ആയോഗ് കണക്ക് പ്രകാരം. സോഴ്സ് അനുസരിച്ച് ഈ സംഖ്യകൾ മാറുമെങ്കിലും കേരളത്തേക്കാൾ കൂടുതൽ ദരിദ്രർ ഗുജറാത്തിലാണ് ഉള്ളത്).

പറഞ്ഞു വരുമ്പോൾ കോടീശ്വരന്മാരുടെ എണ്ണം ഗുജറാത്തിലാണ് കൂടുതലെങ്കിലും സമ്പത്ത് താരതമ്യേന കൂടുതൽ തുല്യമായി വീതിക്കപ്പെടുന്നത് കേരളത്തിലാണ്. ഇതിൽ ഏതാണ് നല്ലതെന്ന് നിങ്ങൾക്ക് തീരുമാനിക്കാം.

സ്വയം പ്രഖ്യാപിത സാമ്പത്തിക വിദഗ്ധരുടെ ബാഹുല്യമാണ് കേരളം നേരിടുന്ന പ്രധാനപ്പെട്ട ഒരു പ്രശ്നമെന്ന് എനിക്ക് ചിലപ്പോൾ തോന്നാറുണ്ട്. സാമ്പത്തിക ശാസ്ത്രം പോലെ ഇത്ര വികാസം പ്രാപിച്ച ഒരു മേഖലയിൽ ഒരു വിദഗ്ദൻ ഉണ്ടാവുക എന്നത് ബുദ്ധിമുട്ടായി കാര്യമാണ്. ഉദാഹരണത്തിന് ഒരു ഇൻവെസ്റ്റ്മെന്റ് ബാങ്കിലെ റിസ്ക് ഡിപ്പാർട്മെന്റിൽ അനേക വർഷം ജോലി ചെയ്ത എന്നോട് ഇന്ത്യയിലെ വാട്ടർ ടേബിൾ താഴുന്നത് എങ്ങിനെയാണ് നമ്മുടെ സമ്പത് വ്യവസ്ഥയെ ദീർഘകാലത്തേക്ക് ബാധിക്കുക എന്ന് ചോദിച്ചാൽ, എനിക്ക് ഒരു പിടിയും ഉണ്ടാകില്ല. അതേസമയം environmental economics പഠിച്ച ഒരാൾക്ക് അതിനു മറുപടി പറയാൻ കഴിയും. പക്ഷെ അങ്ങേരോട് എനിക്കറിയാവുന്ന value at risk എന്താണെന്ന് ചോദിച്ചാൽ പുള്ളിക്കും അറിയാൻ പറ്റണം എന്നില്ല. കെ റെയിലിനു വേണ്ടി കടം എടുക്കുന്നത് ആത്മഹത്യയാണെന്ന് ഒക്കെ പല വിദഗ്ധരും എഴുതുന്നുണ്ട്, ഇവർക്ക് ഇങ്ങിനെയുള്ള കാര്യങ്ങളിൽ ഉള്ള അറിവിന്റെ കാര്യത്തിൽ എനിക്ക് നല്ല സംശയമുണ്ട്. ഒരു വീടിന് ലോൺ എടുക്കുന്ന പോലെയാണ് സർക്കാരുകളുടെ വികസന പ്രവർത്തനങ്ങളുടെ കടങ്ങൾ പ്രവർത്തിക്കുന്നത് എന്ന് കരുതുന്നവരാണ് കൂടുതലും.

മൈക്രോഇക്കണോമിക്സ് , മാക്രോ എക്കണോമിക്സ് എന്നീ വലിയ വിഭാഗങ്ങൾക്ക് അടിയിൽ തന്നെ പല ഉപവിഭാഗങ്ങളുണ്ട്. സർക്കാർ ഒരു പദ്ധതിക്ക് വേണ്ടി വിദേശ ബാങ്കിൽ നിന്ന് കടം എടുക്കണോ വേണ്ടയോ എന്ന് തീരുമാനിക്കുന്ന സാമ്പത്തിക വിദഗ്ധരും ഇൻഷുറൻസിന് എത്ര പ്രീമിയം ചാർജ് ചെയ്യണമെന്ന് തീരുമാനിക്കുന്ന സാമ്പത്തിക വിദഗ്ധരും ചെയുന്നത് തീർത്തും വ്യത്യസ്തമായ ജോലികളാണ്. കേരളത്തിന്റെ പ്രത്യേക സാമ്പത്തിക സ്ഥിതിയെക്കുറിച്ച് മുൻ മന്ത്രി തോമസ് ഐസക്കിനും, ഒരു പക്ഷെ ശാസ്ത്ര സാഹിത്യ പരിഷത്തിനും, CDS നും ഒക്കെ പുറത്ത് നിന്നുള്ള മറ്റ് വിദഗ്ദന്മാരെക്കാൾ വലിയ അറിവുണ്ടാകും.

ഞാൻ ഉൾപ്പെടെ, നമ്മളിൽ പലരും വീണുപോവുന്ന ഒരു കുഴിയാണ് Dunning-Kruger Effect. ഒരു കാര്യത്തെ കുറിച്ച് വിക്കിപീഡിയയിലും ഇന്റർനെറ്റിലും കുറച്ചു വായിച്ചു കഴിഞ്ഞ ഉടനെ നമ്മൾ ആ മേഖലയിൽ ഒരു വിദഗ്ധനാണ് എന്ന് നമുക്ക് സ്വയം തോന്നുന്ന ഒരവസ്ഥയാണിത് (ചില പ്രത്യേക വ്യക്തികളെ ഉദ്ദേശിച്ച് പറഞ്ഞതല്ല). കുറെ ആഴത്തിൽ പഠിച്ചു കഴിയുമ്പോൾ ആകും നമുക്ക് ഈ വിഷയത്തെ കുറിച്ച് ഒരു തേങ്ങയും അറിയില്ല് എന്ന് നമുക്ക് മനസിലാകുന്നത്. കെ റെയിലിനു പകരം ഇപ്പോൾ ഉള്ള പാലങ്ങളുടെ വളവ് നിവർത്തിയാൽ പോരെ എന്ന് പറയുന്ന കേരളത്തിലെ വിദഗ്ധനോട് ട്രെയിനിന്റെ ചക്രം എന്തിനാണ് conical ആകൃതിയിൽ ഉള്ളത് എന്ന് ചോദിച്ചാലോ, ഒരു ഫിക്സഡ് ആക്‌സിലിൽ ഉറപ്പിച്ചു വച്ചിരിക്കുന്ന ട്രെയിനിന്റെ ചക്രങ്ങൾ എങ്ങിനെയാണ് വളവ് തിരിയുന്നത് എന്നും ചോദിച്ചാൽ പലപ്പോഴും ഉത്തരം ഉണ്ടാവില്ല. ഇതേ എഫക്ടിന്റെ മറു വശമാണ് ഇതിനെപറ്റി നന്നായി അറിയുന്നവർ മിണ്ടാതെയിരിക്കും എന്നുള്ളത്. നമ്മുടെ ദുർവിധിയും അതുതന്നെയാണ്. ലോകത്തിന് കീഴിലുള്ള ഏതു വിഷയത്തെ കുറിച്ച് ചർച്ച ചെയ്യാനും നമ്മുടെ ചാനലുകളിൽ ഒരേ ആളുകൾ വരുന്നതിന്റെ രഹസ്യവും Dunning-Kruger Effect തന്നെയാണ്.

നോട്ട് 1 : കേരളത്തെ “ഖേരളം” എന്ന് വിളിച്ചു കളിയാക്കുന്നവർ പൊട്ടൻഷ്യൽ സംഘികളാണ് എന്നാണ് എന്റെ തോന്നൽ. സംഘികളാണ് കേന്ദ്രത്തിന് വേണ്ടി കേരളത്തെ കളിയാക്കുന്നവർ. ബാക്കി എല്ലാവരും കേരളത്തിന്റെ ഇന്നത്തെ പുരോഗതിക്ക് അവകാശം ഉള്ളവരാണ്. ഇടതുപക്ഷ സർക്കാരിനെ വിമർശിക്കാൻ കേരളത്തിന്റെ ഇതുവരെയുള്ള നേട്ടങ്ങളെ, “ഖേരളം” എന്ന് വിളിച്ച് ഇകഴ്ത്തി കാണിക്കേണ്ട ഒരു കാര്യവുമില്ല. കേരളം സ്വർഗ്ഗമൊന്നുമല്ല, പക്ഷെ ഇങ്ങിനെ കളിയാക്കാൻ മാത്രം മോശം ജനതയല്ല നമ്മൾ. പല കോൺഗ്രെസ്സുകാരും ഇങ്ങിനെ ഉള്ളവരുടെ കൂടെ കൂടുന്നത് കാണുമ്പോൾ സങ്കടം തോന്നുന്നുണ്ട്.

നോട്ട് 2 : കോടീശ്വരൻ എന്നുള്ള വാക്ക് super rich, billionaire എന്നൊക്കെ ഉള്ള ഇംഗ്ലീഷ് വാക്കുകൾക്ക് പകരം ഉപയോഗിച്ചതാണ്. പണ്ടൊക്കെ ഒരു കോടി രൂപ ഉള്ളവർ ഈശ്വരൻ ആയിരുന്നു, ഇപ്പോൾ ഒരു കോടിക്ക് ഈശ്വരൻ പോയിട്ട് തന്ത്രി പോലും ആകില്ല 🙂